Correo corporativo VS Correo gratuito

email-corporativo-email-gratuito

email-corporativo-email-gratuitoO correo electrónico leva entre nós máis de 50 anos, e tal vez sexa dos sistemas que menos evolucionou ao longo de toda a era “dixital”. Aínda así se mantén a día de hoxe como unha ferramenta esencial das comunicacións a través de internet.

A maioría dos que non somos nativos dixitais, aínda lembramos aqueles anos 90 nos que o máis parecido a unha rede social era o IRC, e podíamos facernos unha conta de correo electrónico de Hotmail co noso “nick” para chatear con noso ligue a través de Messenger.

Tal vez parecese, por aquel entón, que contar cun servizo de correo electrónico corporativo estivese só ao alcance de empresas grandes. O certo é que hoxe en día é accesible a todo o mundo e ademais é un servizo moi económico que merece a pena contratar.

Estamos a falar de crear a túa propia conta de correo electrónico profesional, co nome que ti escollas (a condición de que estea dispoñible), e deixar de lado a terminación de ….@gmail.com ou …@ hotmail.com na túa dirección de correo.

A miúdo vemos exemplos disto en publicidade, vehículos de empresa, mesmo en webs (algo por outra banda incomprensible). É moi habitual atopalo sobre todo en profesionais independentes, como fontaneiros, electricistas, etc…

Por poñerche un exemplo, imaxína que o avogado “Xesús Blanco” entrega a súa tarxeta profesional a un cliente onde figura como dirección de correo xesusblancoabogado@gmail.com. Se contratase un servizo de correo profesional personalizado co seu propio dominio, rexistrando “blancoabogados.com” a súa dirección de correo electrónico podería ser xesus@blancoabogados.com, cal dos dous daríache máis confianza?

Póñoche outro exemplo máis práctico. O Hotel San Xoan xestiona todas as súas comunicacións a través da dirección de correo hotelsanxoan@gmail.com. A través del xestionan as reservas dos seus clientes, manteñen o contacto cos seus provedores e encárganse ademais da xestión de eventos nos seus salóns. Neste caso é aínda máis interesante contar cun dominio propio, de modo que se puidese xestionar cada servizo cunha conta diferente, así poderiamos ter: reservas@hotelsanxoan.com, comercial@hotelsanxoan.com e eventos@hotelsanxoan.com.

Está claro que a primeira impresión xoga un papel moi importante cando falamos da nosa profesión ou dos servizos que ofrecemos. Aínda sen ter páxina web, só o feito de contar cun dominio de correo propio, achega un plus de valor engadido á imaxe da túa empresa. De entrada xera confianza e seguridade no cliente, e o que é máis importante, demostra que detrás diso hai un profesional.

En resumo, que beneficios achega ter a túa propia dirección de correo electrónico?

Imaxe de marca

É sen dúbida o principal beneficio. O teu correo corporativo falará por ti da túa marca en cada correo que envíes, será máis recoñecible e destacará fronte á competencia. Lembremos os exemplos que comentamos antes e poñámonos en situación. Inspira máis confianza unha dirección de correo personalizada, onde alguén se preocupou de buscar e rexistrar un nome de dominio, que unha conta gratuíta que se da de alta en cuestión de segundos, non te parece?

Mellor infraestrutura

Contratar un servizo deste tipo permíteche contar coa posibilidade de crear máis dunha conta de correo co teu dominio, ademais de dispoñer polo xeral, de máis espazo de almacenamento que outros servizos gratuítos. Terás ademais a posibilidade de seguir usando a plataforma de Gmail, se estás afeito a ela, configurando a nova conta como externa, ou calquera software de xestión de correo (Outlook, Thunderbird…) Igualmente, poderás configurar as túas contas no teu dispositivo móbil, ademais de poder acceder aos teus buzóns de correo desde calquera lugar a través dun dispositivo con conexión a internet, empregando webmail.

Seguridade e privacidade

Loxicamente, ao pagar por un servizo, espérase unha mellora evidente en todos os apartados funcionais, pero ademais estaremos a investir na seguridade e privacidade de todas as comunicacións que fagamos a través do noso correo, algo no que un servizo gratuíto non pode competir.

Quero ter o meu correo electrónico profesional, por onde comezo?

1.- Escolle o nome da túa “marca”

O primeiro que deberías facer sería pensar en cal é a marca que che gustaría rexistrar, xa sexa o teu propio nome ou un nome comercial. Cada caso é moi particular, pero unha boa recomendación é que acompañes o teu nome comercial da actividade principal do teu negocio. Se seguimos cos exemplos que comentamos anteriormente, o avogado Xesús Blanco, pode rexistrar blancoabogados.com, e o Hotel San Xoán, pode rexistrar hotelsanxoan.com. Deste xeito, a ollos dun potencial cliente, estamos a definir a nosa actividade con tan só mostrar unha dirección de correo electrónico. Ten en conta tamén, que se nun futuro próximo queres ter a túa propia páxina web, sería boa idea conservar o mesmo nome rexistrado.

2.- Comproba se está dispoñible

O primeiro paso é importante, pero non é definitivo. Se o nome da túa marca é moi común, é probable que alguén xa o rexistrara con anterioridade. Nese caso terás que volver ao primeiro paso e pensar en alternativas. Se blancoavogados.com xa está rexistrado, podes probar con blanco-avogados.com ou blancoavogados.es ou calquera outra extensión de dominio (hoxe en día hai multitude…)

Para comprobar se un nome está dispoñible podes facelo sen gastar un peso en calquera empresa de rexistro de dominios.

Se temos que recomendarvos algunha empresa en concreto, nós sempre tiramos para a terra, e adoitamos traballar con Dinahosting ou Raiola. Ambos ofrecen servizos de aloxamento para correo por pouco máis de 1€ ao mes.

Deixámoste un par de enlaces para que poidas comprobar os seus servizos de primeira man.


Dinahosting: dominios e aloxamento web

Hosting SSD

Tes dúbidas?

Se queres facernos algunha pregunta, ou mesmo queres que xestionemos isto por ti, ponte en contacto connosco!

5 razóns para contratar a un deseñador web profesional

5 razóns para contratar a un deseñador web profesional

5 razóns para contratar a un deseñador web profesionalNeste post queremos darche 5 razóns polas que deberías contratar a un profesional para deseñar a túa páxina web, e non caer presa do típico cuñadismo, encargándolle a web ao teu primo “o informático” ou peor aínda, deixándoche os cartos en plataformas “faino a ti mesmo”

Non amigo informático, non queremos desmerecer a túa boa intención cando lle dis ao teu “primo” que cunha plantilla de 50€ e unha tarde de sábado, móntaslle unha web nun pispás. Desgraciadamente o abanico de opcións no mundo do deseño web abriuse tanto nos últimos anos que parece que case calquera, cun par de clics, pode ter o seu proxecto en marcha en internet. O certo é que si, sabemos que isto é posible, por iso queremos facerche ver por que recorrer a este tipo de servizos, pode traerche bastantes quebradeiros de cabeza, á parte de xogar en contra da túa propia imaxe para os teus potenciais clientes.

Se aínda así estás a dubidar do que che dicimos ou crees que realmente estás capacitado para facer a túa propia páxina web, déixanos que che falemos destas 5 RAZÓNS polas que deberías contratar a un profesional para deseñar a túa páxina web.

1.- Aforrarás tempo e cartos

Soa moi bonito iso de facelo un mesmo en sinxelos pasos. Desengáñate, crear unha web leva tempo, non é un proceso simple nin barato (aínda que o pareza), e as ferramentas que poidan poñer á túa disposición están limitadas, primeiro ao teu orzamento e despois ao teu propio coñecemento do medio. Non será nin o primeiro nin o último cliente que rescatamos das garras destas ferramentas “sacacartos” que se aproveitan do descoñecemento da xente para venderlles un sistema ao que van estar permanentemente atados, e iso cando no mellor dos casos conseguen rematar a súa web. Pensa no tempo que investirás en facelo ti mesmo e as limitacións que vas atopar no camiño (deseños básicos e limitados a unha estrutura determinada, pouca ou ningunha optimización de contidos para o posicionamento (SEO), poucas opcións de adaptabilidade a dispositivos móbiles (web responsive), o propio proceso de aprendizaxe da ferramenta…)

2.- Terás un deseño de gran calidade, exclusivo e personalizado ao 100%

Esta é sen dúbida a clave. Da igual as opcións que che ofrezan para o deseño da túa web. Nunca se vai axustar exactamente ao que queres, e estarás sempre limitado a plantillas predeseñadas ou a entornos de traballo con limitacións. Que custa diñeiro? por suposto, non che imos a enganar, ao fin e ao cabo crear un deseño desde cero adaptado ás túas necesidades leva moito traballo, pero o resultado será 1000 veces mellor que o que poidas alcanzar deseñándoa ti mesmo. Lembra, un deseñador ten a capacidade de interpretar as túas ideas e é capaz de crear un deseño que se axuste a elas (case) sen límites.

3.- A experiencia é un grao, e máis cando falamos de deseño web

Poucos sectores evolucionan tan rápido e en tan pouco tempo. No noso caso levamos case 20 anos dedicándonos ao mundo do deseño web, durante os cales estivemos continuamente formándonos e adaptándonos ás novas tendencias e tecnoloxías que van saíndo ao mercado. Neste sentido, a especialización e a experiencia son factores determinantes para ofrecer un produto de calidade que cumpra cos requisitos de calquera cliente, adaptando ademais o seu custo ás súas necesidades reais.

4.- Esquécete das cotas, a túa web será sempre túa

Tal vez sexa outra razón de peso para deixar de lado as ferramentas de creación de webs. Excluíndo as versións gratuítas, que inclúen publicidade e non teñen posibilidade de contratar dominios, todas requiren do pago dunha cota mensual ou anual só por manter a túa web online, e se deixas de pagar, quedas sen ela, así de fácil…

Cando contratas a un profesional, él encargarase de facer todas as xestións de rexistro de dominio, contratación de aloxamento, deseño e posta en marcha, e entregarache un sistema completo e funcional do que ti serás o único dono e poderás decidir que facer con ela no futuro, sen ter que pagar máis nada que o dominio e o aloxamento.

5.- Soporte personalizado e mantemento/actualización

Outra das vantaxes de contratar o deseño da túa web cun profesional, é que o terás sempre ao teu lado para solucionar calquera dúbida ou problema técnico e terás tamén a posibilidade de contratar un servizo de actualización, para garantir que a túa web sempre estea ao día e nunca quede obsoleta.

Con isto queremos romper unha lanza en favor de todos os estudos de deseño coma o noso, no que coidamos tanto os proxectos dos nosos clientes coma se fosen propios.

Ademáis, non é bo momento este para apoiar ao negocio local?

Escríbenos! – hola@esmera.es

Sobre o noso blog. Qué vas atopar aquí?

Cando nos decidimos a poñer en marcha o noso blog, tiñamos claro que tería que ser algo diferente ao que se soe ver nestas seccións na gran maioría de empresas do sector do márketing, o deseño ou a publicidade. Neles adoitan abundar artigos con contido moi técnico dirixido a profesionais ou estudantes que buscan estar sempre á última.

Sabemos que pertencemos a un sector moi cambiante, no que o lema “renovarse ou morrer” está á orde do día, e non nos cabe dúbida de que artigos dese estilo son moi necesarios (nós mesmos consumímolos case a diario), pero tamén sabemos que hai unha barreira que impide que moitos profesionais doutros sectores se decaten de que vai isto do márketing dixital, e esta é a nosa oportunidade para lanzar un pouco de luz respecto diso 🙂

A quen vai dirixido este blog?

A ti, que estás a pensar en converterte en emprendedor, que comezas a túa andaina como profesional por conta propia e que sabes que hai algo “a outra beira” pero descoñécelo ou che parece todo moi abstracto.

Á túa empresa ou pequeno negocio, que nunca pasou do anuncio en prensa especializada ou que sempre lle deu vertixe dar o salto ao mundo dixital.

En definitiva, a todo aquel que teña certo interese en saber como pode aproveitar todas as ferramentas que ten á súa disposición pero que por descoñecemento nunca se decidiu a probar.

De que imos falar?

De todo aquilo que forma parte do amplo campo do márketing dixital, explicado para xente do montón, para que poidan facerse unha idea da gran cantidade de recursos que teñen por explotar e para que poidan romper o xeo e empezar a asomarse a este mundo tan interesante como extenso, aínda que sexa timidamente.

O noso propósito é simple, queremos que che pique a curiosidade, despexarche as dúbidas, e axudarche a dar ese pasiño que che falta para botar a andar o teu proxecto.

Estarémosche agardando 🙂

Reseteando

“Se queres facer un blog, que saibas que hai que publicar con frecuencia”

Aínda lembramos cando (fai non moito) xurdiu este tema nunha reunión cun cliente ante a súa proposta de crear unha sección de blog na súa web. E lonxe de predicar co exemplo, aquí atopámonos, a finais do ano 2020, case un ano despois de estrear esta nosa sección onde nos atopamos, vendo que no historial de artigos non hai máis que tres entradas…

Entre medias cruzáronse a bipaternidade do que escribe, moito curro e unha pandemia, que trastornaron o plan de traballo que tiñamos pensado, dando como resultado o que podedes ver por aquí…un deserto.

E non é por falta de contidos por publicar, xa que seguimos traballando duramente durante todos estes meses e temos proxectiños que xa viron a luz e que aínda non vos presentamos por aquí, pero sinceramente vímonos superados como nunca antes.

Así que tiraremos de refraneiro, xa que “non hai mal que por ben non veña” e non queremos saber nada diso que se di de “en casa de ferreiro coitelo de pau”, porque aínda que digan que do “dito ao feito hai un treito” estamos dispostos a facer “borrón e conta nova” con este blog.

Leña!

Proxecto – Tenda online Pazo Gil Casares, aceite de camelia

Tenda online Pazo Gil CasaresAntes de que remate o ano, queremos falar do último proxecto no que estivemos traballando, a tenda online de Pazo Gil Casares – Aceite de Camelia. A verdade é que en canto nos presentaron o traballo debecíamos por comezar a darlle forma.

A súa historia é a do Pazo Gil Casares, situado na provincia de Pontevedra que debe o seu nome ao doutor Miguel Gil Casares, insigne médico galego que no seu día foi propietario tamén do coñecido Pazo de Fefiñáns, en Cambados. Nos seus xardíns é onde se atopan  as árbores de camelia que son o froito do que se extrae o aceite natural.

Este é un deses proxectos nos que nos gusta implicarnos especialmente, proxectos pequeniños que se fan con moita ilusión e polos que paga a pena esmerarse, poñendo toda a atención aos detalles.

Web Pazo Gil Casares

O mapa do Nadal de Vigo 2019

Mapa do Nadal de Vigo 2019

Mapa do Nadal de Vigo 2019Chegou decembro, e con él as festas xa están á volta da esquina. Vendo de onde somos (Vigo) e tendo en conta a tremenda repercusión que tivo o alumeado de nadal da cidade nos últimos anos, non quixemos ser menos e acabamos de deseñar o Mapa do Nadal de Vigo 2019.

Hai opinións de todo tipo, a favor e en contra, pero é innegable que se trata dunha campaña de marketing 100% efectiva, coa que se conseguiu que Vigo estea presente nos medios de toda España.

Así que aquí vai a nosa pequena aportación a dito fenómeno. Trátase dun completo mapa do centro da cidade onde tentamos reunir os principais elementos do “circuito navideño”, incluíndo mercadiños, exposicións e eventos, cos seus horarios e prezos.

Podedes imprimilo nun folio A4 para levalo cando visitedes a cidade, en un A3 para poñelo no voso local ou escaparate, ou simplemente podedes gardalo no móvil para consultalo cando queirades.

Mapa do Nadal Vigo 2019 [Galego]

Mapa do Nadal de Vigo 2019 [Español]

Estreamos blog!

Blog Esmera marketing dixital, Vigo

Blog Esmera marketing dixital, VigoNon era sen tempo! Despois de uns cantos anos por aquí por fin decidimos facer un blog onde poidamos deixar todas as nosas inquedanzas no que respecta ao mundo do deseño gráfico o deseño web e o extenso campo do marketing dixital.

Por aquí falaremos das nosas experiencias, compartiremos curros de outros colegas, falaremos de WordPress (moito WordPress), compartiremos consellos e ferramentas que usamos no noso día a día, faremos crítica do que nos pareza (sempre desde o respeto 😉 e tamén autocrítica, ninguén é perfecto!

En definitiva, falaremos do pasado, presente e futuro dun sector tan cambiante coma o noso e como o imos afrontar.

Un saúdo e…happy blogging!! 🙂